III Xornada de Bibliotecas Públicas de Galicia 2021
A biblioteca Neira Vilas participou este ano na III Xornada de bibliotecas públicas de Galicia 2021
Este ano a xornada celebrada na Cidade da Cultura tiña como lema A Biblioteca Social. A nosa biblioteca formou parte da “Mesa de experiencias. A biblioteca inclusiva e integradora”, onde a nosa compañeira Mar García presentou o proxecto Achegando Culturas.
Achegando Culturas é o programa que iniciamos no 2012, xunto á Fundación Secretariado Xitano de Vigo para fomentar a lectura, a integración social e a diversidade, co que pretendemos alonxarnos de prexuízos e tópicos e coñecer máis sobre a cultura xitana.
A biblioteca “Xosé Neira Vilas” é unha biblioteca pública, tanto pola titularidade, que é municipal, como polas persoas ás que se dirixe: ao conxunto da cidadanía sen ningún tipo de distinción de idade, raza, sexo, relixión, condición ou opinión.
A parte de prestar os servizos tradicionais dunha biblioteca, pon énfase no desenvolvemento de servizos e recursos adaptados ás necesidades culturais e informativas específicas do seu contorno establecendo vínculos de cooperación coas organizacións cidadás da súa área de influencia.
A súa misión é a de ser un centro territorial de comunicación, información e promoción lectora; un espazo referente para a zona, no que a veciñanza acude para xerar demandas, satisfacer as súas necesidades ou simplemente un lugar de encontro, integrador das distintas sensibilidades sociais e vitais que coexisten e conviven ao seu redor.
Ver todas las entradas de Biblioteca Xosé Neira Vilas
Achegando culturas 